अमेरिकाको टेक्सास निवासी एक महिला एक दिनका लागि करोडपति बनिन् । बैंकले उनको खातामा गल्तीवश ३७ मिलियन डलर जम्मा गरिदिएको थियो ।
रुथ बलुन नामकी ति महिलाले आफ्नो कामको सिफ्ट सकेर आफ्नो फोनमा एकाउन्ट चेक गरिन् ।
त्यतिबेला दंग परिन् जतिबेला उनले आफ्नो खातामा ३ करोड भन्दा धेरै डलर रहेको देखिन् ।
‘बैंक खातामा यति धेरै पैसा देखेर म खुशी भएँ,’ स्थानीय सञ्चारमाध्यमहरूलाई बलुनले भनिन् ।
केही समय लामो लामो सास लिएपछि बलुनले यो कुरा आफ्नो पतिलाई बताइन् । उनको पतिले यतिधेरै पैसा कसरी आयो भनेर बैंकसँग कुरा गर्न सल्लाह दिए ।
उनले बैंकका अधिकारीहरूसँग यसबारेमा कुरा गरिन् । ‘उनीहरू पनि अचम्म परे,’ बलुनले भनिन्, ‘यत्रो पैसा गल्तीवश मेरो एकाउन्टमा ट्रान्सफर भएको विषय उनीहरूलाई पनि थाहा रहेनछ ।’
बैंकका अधिकारीहरूले उनीसँग माफी मागे र उनको एकाउन्टबाट पैसा फिर्ता गरे ।
‘मलाई लागेको थियो, कसैले मलाई गिफ्ट गर्यो,’ बलुनले भनिन्, ‘तर मेरो खुसी धेरैबेर टिक्न सकेन । त्यो पैसा गल्तीवश मेरो एकाउन्टमा आएको रहेछ । अनि बैंकले पैसा फिर्ता लग्यो ।’
बैंकले कुनै विदेशीले पैसा जम्मा गर्ने क्रममा गल्तीवश उनको एकाउन्ट नम्बर थिचिएको भन्दै विज्ञप्ति नै निकालेको थियो ।
