काठमाडौं । लगातार तेस्रो दिन पनि सेयर बजारमा गिरावट आएको छ । बुधबार ८.११ अंकले घट्दै सेयर बजार २१५६.२० को बिन्दुमा ओर्लिएको छ ।
बुधबार घटेको बजारमा कारोबार रकम पनि यसअघिका दिनहरुमा भन्दा निकै कम भएको छ । ७३ लाख ९९ हजार ४७४ कित्ता किनबेच हुँदा बुधबार दुई अर्ब ४३ करोड २५ लाख ८ हजार ७६९ रुपैयाँको कारोबार भएको छ ।
बुधबार सबैभन्दा धेरै बीमा, होटेल, निर्माण र माइक्रो फाइनान्स क्षेत्रका कम्पनीको मूल्य गिरावट आयो । निर्जीबन बिमा क्षेत्रमा ८६.७२ अंकले गिरावट आउँदा होटल तथा पर्यटन क्षेत्रमा ८५.४२ अंकले गिरावट आयो ।
यस्तै, निर्माण तथा प्रोसेसिङ्ग क्षेत्रमा ४९.३५ अंकले घटेको छ भने लघुवित्त क्षेत्रमा ३०.९९ अंकले घट्यो । १३ क्षेत्रमध्ये १० क्षेत्रमा गिरावट आएको छ भने तीन क्षेत्रमा सामान्य बृद्धि छ ।
घटेको बजारमा पनि सबैभन्दा धेरै किसान लघुवित्त, ग्रिन डेभपलमेन्ट बैंक, बाराही हाइड्रोलगायतका लगानीकर्ताले फाइदा कमाए भने जाल्पा लघुवित्त, युनियन लाइफ, सिटिजन सामूहिक लगानीलगायतका कम्पनीको मूल्यमा उच्च गिरावट आयो ।
ठूलो रकमका गिरावटका बीच बुधबार एकल अंकले घट्दै गर्दा आगामी दिनमा केही बढोत्तरी हुनसक्ने अपेक्षा गर्न सकिन्छ ।
