भीषण बाढीका कारण नुवाकोटस्थित माथिल्लो त्रिशूली ‘३ ए’ जलविद्युत आयोजनाको सुरुङभित्र फसेका मानिसहरूको उद्धारका लागि सुरक्षा निकाय र प्राविधिक टोलीले हरसम्भव प्रयास गरिरहेका छन्।
आयोजनास्थलसम्म पुग्ने सडक मार्ग बाढीले अवरुद्ध बनाएपछि नेपाली सेनाले उद्धारका लागि भारी उपकरणहरू ओसार्ने फरक उपाय अपनाएको छ। नुवाकोटको बट्टारमा डोजर र स्काभेटरहरूलाई खण्ड-खण्ड (डिसमेन्टल) पारेर छुट्ट्याइएको छ र तिनलाई हेलिकप्टरमार्फत सीधा घटनास्थलमा पुर्याइएको छ।
यसैबीच, उद्धार टोलीले सुरुङको पहुँचमार्ग (मुख) फेला पार्न सफल भएको छ। सुरुङभित्र फसेका मानिसहरूको जीवनरक्षाका लागि टोलीले तत्काल सुरुङको मुखबाट अक्सिजन पठाउन सुरु गरिसकेको छ।
घटनास्थलमा खटिएका रास्वपा सांसद श्रीराम न्यौपानेका अनुसार बाढीको प्रतिकूल मौसम र रातभरिको जटिल परिस्थितिका बाबजुद उद्धार टोली निरन्तर खटिरहेको छ।
अहिले नेपाली सेनासहितको संयुक्त टोलीले हेलिकप्टरबाट लगिएका उपकरणहरूलाई पुनः जोडेर (एसेम्बल गरेर) सुरुङभित्र रहेकाहरूको सुरक्षित उद्धारका लागि बाटो खोल्ने काम तीव्र बनाएको छ।
