शुक्रवार तीनकुनेमा भएको राजावादी समूहको प्रदर्शनका ‘कमाण्डर’ दुर्गा प्रसाईं भागेर भारत पुगेको आशंका प्रहरीले गरेको छ ।
प्रसाईं शुक्रवार राति नै काठमाडौँबाट झापातिर लागेको र त्यहाँबाट स्थलमार्ग हुँदै भारत पसेको हुनसक्ने अनुमान प्रहरीको रहेको प्रहरी उच्च स्रोतको दाबी छ । उनी यसअछि पनि पटक-पटक भारत आउजाउ गर्ने गर्दथे ।
तीनकुनेमा भएको प्रदर्शन एकाएक हिंसात्मक भएपछि एक स्थानीय र अर्का एक पत्रकारको मृत्यु भएको थियो ।
प्रसाईंले जबरजस्ती प्रहरीलाई पेल्दै निषेधाज्ञा तोडेका थिए । प्रदर्शनका क्रममा कैयौं गाडीहरू जलाइएका थिए भने निजी घरमा आगजनी गर्नुका साथै तोडफोड गरिएको थियो ।
प्रदर्शनकारीलाई उक्साएको आरोपमा राप्रपाका महामन्त्री धवलशमशेर राणा र उपाध्यक्ष रविन्द्र मिश्र लगायत १ सय २२ जनालाई प्रहरीले गिरफ्तार गरिसकेको छ ।
उनीहरूमाथि व्यक्ति हत्या, संगठित अपराध, तोडफोड जस्ता मुद्दाहरू लगाउने तयारी गरिएको छ ।
यसैबीच, शनिवार बसेको राप्रपाको बैठकले प्रहरीको गिरफ्तारीमा परेका आफ्ना नेताहरूलाई तत्काल छोड्न सरकारसँग अपीलसमेत गरेको छ ।
