पाल्पाको माथागढी गाउँपालिकामा अविरल वर्षाका कारण गएको पहिरोले ठूलो मानवीय क्षति पुर्याएको छ। रुप्से र भैसक्ट्टामा घर पुरिँदा एक जनाको मृत्यु हुनुका साथै अन्य तीन जना बेपत्ता भएका छन्, जसले स्थानीय क्षेत्रमा ठूलो शोक र त्रास फैलाएको छ।
माथागढी-२, रुप्सेमा घर पुरिँदा ७५ वर्षीय शेरबहादुर चिदीको ज्यान गएको छ। घरमा पहिरो खस्ने समयमा उनकी श्रीमती शौच गर्न बाहिर गएका कारण दैवयोगले सकुशल बचिन् भने उपचारको क्रममा अस्पताल पुर्याइएलगत्तै चिदीलाई मृत घोषणा गरियो।
त्यसैगरी, माथागढी-३, भैसक्ट्टामा गएको अर्को ठूलो पहिरोले दुईवटा घर पूर्ण रूपमा पुर्दा लिलबहादुर घर्ती मगर, उनकी १७ वर्षीया छोरी दिना र छिमेकी १५ वर्षीया झरना घर्ती बेपत्ता भएका छन्। घटनाबारे थाहा पाएलगत्तै नेपाली सेना, नेपाल प्रहरी र सशस्त्र प्रहरीको टोली उद्धार कार्यमा खटिए पनि पहिरो धेरै ठूलो भएका कारण खोजतलास र उद्धारमा कठिनाइ भइरहेको छ।
