राजधानी काठमाडौंको तीनकुनेमा राजावादी समूहले आयोजना गरेको प्रदर्शनका क्रममा एभिन्युज खबरका पत्रकार सुरेश रजकको मृत्यु भएकोबारे टेलिभिजनले गृहमन्त्री रमेश लेखकलाई पत्र लेखेको छ ।
पत्रमा एउटा पत्रकारको जिउँदै जलाएर हत्या गरिएको घटनाले गम्भीर सुरक्षा प्रश्न खडा गरेको उल्लेख छ । साथै सुरक्षा व्यवस्थालाई लिएर मन्त्रीको जवाफसमेत माग गरिएको छ ।
उक्त पत्रमा मृतक पत्रकारलाई शहीद घोषणा गर्नुपर्ने, तीन दिनभित्र उच्चस्तरीय छानबिन समिति गठन गरी दोषीमाथि कडा कारबाही गर्नुपर्ने तथा मृतकका परिवारलाई उचित क्षतिपूर्ति उपलब्ध गराउनुपर्ने माग गरिएको छ ।
हेर्नुहोस् पत्र:
श्री माननीय गृहमन्त्री ज्यू, गृह मन्त्रालय सिंहदरवार, काठमाडौँ ।
मितिः २०८१ चैत १६ काठमाडौँ
विषयः प्रदर्शनका क्रममा पत्रकारको जलेर मृत्यु भएको सम्बन्धमा ।
महोदय,
उपरोक्त सम्बन्धमा चैत १५ गते काठमाडौंको तीनकुनेमा राजावादीहरुले गरेको प्रदर्शनका क्रममा एक निजी घरमा एभिन्युज खबरका पत्रकार सुरेश रजकको जिउँदै जलाएर हत्या गरिएको छ । यसवाट हामी टेलिभिजन परिवार र पत्रकार रजकको परिवार मर्माहित र स्तब्ध भएका छौं। एउटा पत्रकारले काठमाडौँमा भएको प्रदर्शनको दृष्य छायांकन गरिरहेको अवस्थामा जिउँदै जल्नुपर्ने अवस्थाले देशकै सुरक्षा व्यवस्थाप्रति गम्भीर प्रश्न खडा गरेको छ। यस सन्दर्भमा हामी प्रदर्शनकारीको अराजकता र राज्य पक्षको गैर जिम्मेवारीपनप्रति घोर भर्त्सना गर्दछौं। यस घटनाप्रति अझै पनि राज्य र सम्वन्धित पक्ष जिम्मेवार बनोस र तत्काल सम्बोधन गरोस् भन्ने हाम्रो माग छ ।
यस घटनाका सन्दर्भमा राज्य समक्ष टेलिभिजन परिवार र मृतक पत्रकार रजकको परिवार संयुक्त रुपमा निम्न माग पूरा गर्न आग्रह गर्दछौं ।
१. मृतकलाई निरपेक्ष रुपमा शहीद घोषणा गर्नुपर्ने ।
२. उच्चस्तरीय समिति गठन गरेर तीन दिन भित्र घटनाको निष्पक्ष छानबिन गरी दोषीलाई कडाभन्दा कडा कारबाही गर्नुपर्ने ।
३. मृतकका परिवारलाई उचित क्षतिपूर्ति उपलव्ध गराउनुपर्ने ।
