कुमारी बैंक लिमिटेडले बाजुराको दुर्गम हिमाली क्षेत्र गौमुल गाउँपालिकाका छ वटा सामुदायिक विद्यालयहरूलाई स्मार्ट टेलिभिजन सहयोग गरेर ग्रामीण शिक्षामा प्रविधिको ढोका खोलेको छ। ‘समुदायका लागि कुमारी बैंक’ भन्ने मूल मर्मका साथ बैंकको गौमुल शाखा र स्थानीय गाउँपालिकाको आपसी समन्वयमा यो कार्य सम्भव भएको हो। यस परोपकारी कार्यबाट मानाकोट, जनज्योति, फूलपाता, अम्लिश, किर्तिचौर र बालविकास माध्यमिक विद्यालयका विद्यार्थीहरू प्रत्यक्षरूपमा लाभान्वित भएका छन्। भौगोलिक विकटताका कारण आधुनिक शैक्षिक वातावरणबाट टाढा रहेका यी विद्यालयहरूमा डिजिटल पूर्वाधार पुग्नु स्थानीय विकासका लागि एक महत्त्वपूर्ण कोशेढुङ्गा साबित भएको छ।
यो कदमले ग्रामीण र शहरी क्षेत्रबीच रहेको शैक्षिक साधन-स्रोतको खाडललाई पुरेर दुर्गमका बालबालिकाहरूलाई पनि आधुनिक प्रविधिसँग जोड्ने नयाँ अवसर जुराएको छ। अब त्यहाँका विद्यार्थीहरूले केवल किताबका पानामा मात्र सीमित नरहेर श्रव्य-दृश्य र डिजिटल सामग्रीका माध्यमबाट सजिलै र रोचक ढंगले ज्ञान हासिल गर्न सक्नेछन्। शिक्षालाई प्रत्येक बालबालिकाको नैसर्गिक अधिकार मान्दै बैंकले चालेको यो प्रविधिमैत्री अभियानले विद्यार्थीहरूलाई डिजिटल युग सुहाउँदो ज्ञान र सीप सिक्न थप ऊर्जा र प्रेरणा मिल्ने विश्वास गरिएको छ।
विगत २५ वर्षदेखि नेपाली बैंकिङ क्षेत्रमा दरिलो उपस्थिति जनाउँदै आएको कुमारी बैंकले हाल २८६ शाखा, ४१ विस्तार काउन्टर, ३०४ एटीएम र ४० शाखारहित बैंकिङ्ग एकाइहरू मार्फत देशभर सुरक्षित सेवा दिँदै आएको छ। व्यवसायिक सफलतासँगै बैंकले सामाजिक उत्तरदायित्वलाई उत्तिकै प्राथमिकतामा राखेर शिक्षा, स्वास्थ्य र वातावरण संरक्षण जस्ता क्षेत्रमा योगदान पुर्याउँदै आएको छ। आगामी दिनहरूमा पनि समाजको दिगो विकासका लागि यस्ता उदाहरणीय र कल्याणकारी कार्यहरूलाई निरन्तरता दिने प्रतिबद्धता बैंकले जनाएको छ।
