जनकपुरबाट काठमाडौँतर्फ आउँदै गरेको माइक्रोबस सिन्धुलीको गोलन्जोर गाउँपालिका–७ पलासेस्थित बीपी राजमार्गबाट खस्दा ललितपुरको एकै परिवारका आमा र तीन छोरीसहित १४ जना यात्रु घाइते भएका छन्। मंगलबार दिउँसो करिब २ बजे म प्र ०४–००१ ज ०२४३ नम्बरको माइक्रोबस अनियन्त्रित भई सडकबाट झन्डै २० मिटर तल अधेरी खोलाको बगरमा खसेको जिल्ला प्रहरी कार्यालय सिन्धुलीले जनाएको छ।
दुर्घटनामा ललितपुरको भैँसेपाटी बस्ने ३६ वर्षीया प्रियाङ्का साह र उनका तीन छोरीहरू १६ वर्षीया जेनी, ११ वर्षीया सफलता तथा ३ वर्षीया ओमी साह घाइते भएका छन् । यस्तै, धनुषाको शहीदनगर नगरपालिका–२ का एकै थरका बालबालिका तथा किशोरहरू १४ वर्षीय पियुष गोहित, १५ वर्षीय आयुष गोहित र १२ वर्षीया रुबी गोहित पनि दुर्घटनामा परेका छन् । घाइते हुने अन्यमा सोही नगरपालिका–७ की १७ वर्षीया रानी कुमारी मण्डल र माइक्रोबस चालक शहीदनगर–८ का दीपक कुमार दास रहेका छन् ।
गाडीमा सवार सबै १४ जना घाइते भएकोमा ९ जनाको पहिचान खुलेको छ भने बाँकी ५ जनाको विवरण संकलन गर्ने कार्य भइरहेको प्रहरीले बताएको छ । घाइते सबैलाई उद्धार गरी उपचारका लागि खुर्कोटस्थित शुभजीवन अस्पताल पठाइएको छ र दुर्घटनाको कारणबारे प्रहरीले थप अनुसन्धान अगाडि बढाएको छ ।