सरकारले निजामती प्रशासनतर्फको उच्च पदमा महत्वपूर्ण नियुक्ति र पदस्थापनको निर्णय गरेको छ। सिंहदरबारमा बुधबार बसेको मन्त्रिपरिषद् बैठकले नेपाल प्रशासन सेवाका सहसचिव कमलप्रसाद भट्टराईलाई राजपत्राङ्कित विशिष्ट श्रेणी (सचिव) पदमा बढुवा गर्ने निर्णय गरेको हो।
लोक सेवा आयोगका कार्यवाहक अध्यक्षको अध्यक्षतामा गठित सिफारिस समितिले पेस गरेको नामावलीका आधारमा सरकारले ज्येष्ठता तथा कार्यसम्पादन मूल्याङ्कनका आधारमा भट्टराईलाई विशिष्ट श्रेणीमा पदोन्नति गरेको हो।
सचिवमा पदोन्नति भएसँगै भट्टराईलाई मुख्यमन्त्री तथा मन्त्रिपरिषद्को कार्यालय, बागमती प्रदेशको प्रमुख सचिवको जिम्मेवारी दिई पदस्थापन गरिएको छ। यसअघि पनि बागमती प्रदेशमै कायममुकायम प्रमुख सचिवको रूपमा जिम्मेवारी सम्हाल्दै आएका भट्टराईले अब औपचारिक रूपमा प्रदेशको सर्वोच्च प्रशासनिक नेतृत्वको बागडोर सम्हाल्नेछन्।
सरकारको यो निर्णयले प्रदेश र संघबीचको प्रशासनिक समन्वय, नीतिगत कार्यान्वयन तथा प्रादेशिक सुशासन थप प्रभावकारी हुने अपेक्षा गरिएको छ।
