मकवानपुरको भीमफेदी गाउँपालिका–६ स्थित चिसापानी गढीको भीरबाट करिब ७०० मिटर तल विद्युतीय (ईभी) गाडी खस्दा १० जनाको ज्यान गएको छ भने ५ जना घाइते भएका छन् । आज बिहान करिब ६:१० बजे काठमाडौंबाट सर्लाहीतर्फ जाँदै गरेको उक्त गाडी अनियन्त्रित भई सडकबाट निकै तल खसेर भयानक दुर्घटनामा परेको हो ।
गाडीमा सवार कुल १५ जनामध्ये १० जनाको मृत्यु भएको प्रारम्भिक विवरण प्राप्त भए पनि दुर्घटनामा परेका केही यात्रु भने बाँच्न सफल भएका छन् । घाइते भएका ५ जनामध्ये सर्लाहीको चक्रघट्टा गाउँपालिका–४, सुन्दरपुरटोलका ३३ वर्षीय मुकेश यादवसहित ५ वर्षीय सक्षमकुमार यादव र ३ वर्षीय सुदन यादवलाई तत्काल उद्धार गरी उपचारका लागि हेटौंडा अस्पताल पुर्याइएको छ ।
अस्पताल स्रोतका अनुसार टाउको र ढाडमा चोट लागेका मुकेश र भित्री चोट लागेका ५ वर्षीय सक्षमकुमारको अवस्था सामान्य रहेको छ । त्यस्तै, टाउको र मुखमा चोट लागेका ३ वर्षीय बालक सुदनको अवस्था मध्यम रहेको र उनीहरूको उपचार भइरहेको छ । बाँकी दुई घाइतेको विवरण र अवस्थाबारे थप जानकारी आउन बाँकी छ ।
भौगोलिक रूपमा कठिन मानिने चिसापानी गढीको करिब ७०० मिटर तल खसेको गाडीबाट यात्रुहरूको उद्धार गर्न यतिबेला तीनवटै सुरक्षा निकाय परिचालित भएका छन् । सशस्त्र प्रहरी बल, सुरक्षा बेस भीमफेदीबाट सशस्त्र प्रहरी नायब उपरीक्षकको कमाण्डमा खटिएको टोलीसँगै नेपाली सेना र नेपाल प्रहरीको संयुक्त टोलीले घटनास्थलमा उद्धार कार्यलाई तीव्रता दिइरहेको छ ।
