काठमाडौँ — बडादसैँको पहिलो दिन आज घरघरमा विधिपूर्वक दियो, कलश र गणेश स्थापना गरी घटस्थापना गरिँदैछ। आजैका दिन पूजा कोठा वा दसैँ घरमा चोखो माटो ल्याई गाईको गोबरले लिपपोत गरेर वैदिक विधिपूर्वक जौँ रोपेर जमरा राख्ने परम्परा छ। नेपाल पञ्चाङ्ग निर्णायक विकास समितिका अनुसार आज बिहान ११ः४७ बजेको अभिजित् मुहूर्त घटस्थापनाका लागि उत्तम साइत रहेको छ।

आश्विन शुक्ल प्रतिपदादेखि पूर्णिमासम्म १५ दिन मनाइने दसैँमा नौ दिनसम्म नवदुर्गाको विशेष पूजा आराधना गरिन्छ। पहिलो दिन शैलपुत्रीदेखि नवौँ दिन सिद्धिदात्रीसम्मका नौ रूपको पूजा गर्दै देशभरका नक्सल भगवती, शोभा भगवती, पलाञ्चोक भगवतीलगायतका शक्तिपीठहरूमा भक्तजनको दर्शन गर्न भीड लाग्ने गर्छ। काठमाडौँको हनुमानढोकास्थित दसैँ घरमा पनि आजै बिहान विधिपूर्वक घटस्थापना गरी पूजा सुरु गरिएको छ।

यस वर्षको विजयादशमी कात्तिक ४ गते परेको छ, जसको देवी विसर्जनको साइत बिहान ८ः४९ बजे र टीका ग्रहणको उत्तम साइत बिहान १०ः२६ बजे रहेको छ। दसैँ सुरु भएसँगै शैक्षिक संस्था र कार्यालयहरूमा बिदा सुरु भएको छ भने रोजगारी तथा अध्ययनका लागि बाहिर रहेका मानिसहरू घर फर्कन थालेकाले राजधानी छाड्नेहरूको बाक्लो चहलपहल देखिएको छ।